Мінекей, алтын күзбен бірге жас зияткерлер үшін аса маңызды Білім күні де келіп жетті. Биылғы оқу жылы егемендігіміздің 30 жылдығымен, кемеңгер Абайдың 175 жылдық мерейтойымен, Жастар жылы мен Кітап жылымен тұспа-тұс келіп тұр.

Алғашқы қоңырау мерекесінде дәстүр бойынша Зияткерлік мектеп ұжымы қабылдау сынақтарынан сүрінбей өтіп, білім грантын иеленген  7-сыныптың 216 оқушысын салтанатпен қарсы алды.

Жыл сайын 1 қыркүйекте мектеп оқушыларының жаз айларындағы жұмыс нәтижелері жарияланады. Биылғы жазда: 727 оқушы «2 апта ауылда» әлеуметтік тәжірибесінен өтсе,  486 оқушы – «10 күн ата-ана жұмысында», 271 оқушы  «1 күн ата-ана жұмысында» жобалары бойынша тағылымдамадан өтті.

Салтанатты жиын барысында жазда өткен түрлі олимпиадалар мен зияткерлік байқауларда жеңіске жеткен оқушыларды мадақтаған мектеп директоры Жакенов Мейрам Әміржанұлы жеңімпаздарға Мақтау қағаздары мен дипломдар табыс етті.

• Балташева Еркежан, 12«С» сынып оқушысы, Санкт-Петербург қаласында Экономикадан өткен әлемдік олимпиадада қола медальға ие болды.
• Алиев Алишер, 12«В» сыныбының оқушысы, «Келешек ғалымдары» атты Малайзияда өткен 8-ші халықаралық конференцияда «Робототехника» секциясы бойынша алтын медаль иеленіп, жүлдегер танылды. Баймуханов Батырхан, 12 «F» сынып оқушысы, «Биология» секциясы бойынша күміс медаль алып, конференцияның жеңімпаздары қатарынан көрінді.
• Исмагулов Темирлан, 11 «Е» сынып оқушысы Тель-Авивте (Израиль) физикадан өткен 50-ші халықаралық олимпаданың Құрмет грамотасымен марапатталды.
• Робототехникадан WRO-2019 Ұлттық олимпиадасының жүлдегерлері 11 «Е» сынып оқушысы Оспанова Шырын екінші дәрежелі дипломмен, 12 «В» сынып оқушылары Алиев Алишер мен Шаяхмет Елдар  үшінші дәрежелі дипломмен марапатталды.
• «Асыл мұра» хореографиялық ансамблі, «Тұмар» мода театры, «Тарлан» театр-студиясы Болгарияда өткен «Рози на Обзор» халықаралық фестиваль-конкурсының лауреаттары атанды. Жетекшілері: Жүсіпова Бекзат, Омарова Салтанат, Тасатхан Бейбітгүл.

Сондай-ақ мектеп директоры 2019 жылы мектеп бітірген түлектердің жетістіктері туралы айта келе, әлемнің ең беделді оқу орындарына оқуға түскен оқушыларды атап өтті.

 

Жетістіктер эстафетасын жалғастырған жүргізушілер жаз айларында  Колумбия және Стэнфорд университеттерінің Жазғы мектептерінде оқыған оқушылар туралы айтты.

Салтанатты жиынның ресми бөлімі аяқталған соң ұлы Абайдың 175жылдығына арналған  «Перзент парызы» атты сахналық қойылым басталды.

Зияткерлік мектептің педагогикалық ұжымы атынан құттықтау сөз ардагер ұстаз, математика пәнінің мұғалімі Бикжанова Зулхия Аманжолқызына берілді.

Жаңа оқу жылына сәт сапар тілеген күміс қоңырау 2019-2020 оқу жылының басталғаны туралы әлемге жария етіп, оқушыларды  «Саналы ұрпақ – жарқын болашақ» атты Білім күнінің алғашқы сабағына шақырды.

Жаңа оқу жылы жетістіктер жылы болсын, достар!