Жақында Қазақстан мен Орталық Азиядағы алғашқы Astana Physics Battles турнирі өтті.

Астана қаласындағы физика-математика бағытындағы Зияткерлік мектептің оқушылары: Амирбек Азатбеков, Қайназар Ақай, Амир Томашпаев, Тимур Амиргалиев, Диас Сейдахметов – Astana Physics Battles турнирінің күміс жүлдегерлері атанды.

Мектебіміздің командасы қазан айында өткізілген ашық онлайн-іріктеуден сәтті өтіп, Haileybury Astana мектебінде өтетін басты кезеңге шақырту алған болатын. Елордада өткен жоғары лигадағы жарысқа 30-дан астам команда қатысты.

Жарыс пікірталас форматында өтті. Бірнеше физикалық шайқаста әр команда берілген олимпиадалық есептердің шешімдерін қорғайды, ал қарсылас команда сол шешімді жоққа шығаруға тырысады.

Шайқас барысында рөлдер бірнеше рет ауысып, есептің дұрыс шешімі үшін немесе қарсылас команданың қате шешімін түзеткені үшін команда ұпай жинайды. Жоғары ұпай алған команда шайқастың жеңімпазы атанады.

Осы жарысқа оқушыларды мектептің физика пәнінен олимпиадалық резерв жаттықтырушысы, мектеп түлегі Исмагулов Темірлан дайындады.

Біздің оқушылар алты қарсылас команданың бесеуін жеңіп, турнирде жоғары ұпаймен ерекшеленді. Физикалық шайқастарға бастаған команда капитаны Амирбек Азатбеков команда мүшелеріне жеңіске жетелейтін рух беріп, ерекше көзге түсті.

Қазір мектептің жас физиктері 2024 жылдың көктеміне жоспарланған екінші жарысқа дайындықты бастап кетті.

Зияткерлер онда да жоғары нәтижеге жететіне сенімді.