«АСТАНА» СПОРТКЛУБЫ ШЕБЕРЛІК САҒАТЫН ӨТКІЗДІ

2023 жылдың 2 ақпанында елордалық физика-математика бағытындағы Зияткерлік мектебінде «Астана» баскетбол клубының негізгі құрам ойыншыларының шеберлік сағаты өтті.
Оқушылардың баскетбол ойынына қызығушылығын арттыру, салауатты өмір салтын насихаттау және осы спорт түрінің қыр-сырымен бөлісу мақсатында ұйымдастырылған шеберлік сағатына «Астана» ойыншылары Майкл Майерс пен Кваме Вон қатысты.
Іс-шара барысында оқушылар атақты ойыншылармен танысып, спортшыларға өздерін қызықтырған түрлі сұрақтарын қойды.
Үлкен спорт жұлдыздары Майкл Майерс пен Кваме Вон жас спортшыларды алаңға шақырып, ептілікті қажет ететін қызу тартысты спорт ойынында допты игерудің түрлі тәсілдерін түсіндірді. Ашық жаттығу кезінде допты қарсыласының кәрзеңкесіне дәл түсірген оқушыға арнайы сыйлық бар екендігін де ескертті.
Алаңда 9 Fсынып оқушысы Алим Даулетбек ерекшеленіп, кәсіби спорт клубының футболкасына ие болды.
Шеберлік сағатында Зияткерлік мектептің спорт сүйген жастары кәсіби спортшылармен бірге ойнап, жақсы әсер, бағалы сабақ алды.
Кездесу соңында «Астана» баскетбол клубы оқушыларға өз ойындарына билеттер табыс етті.
Сондай-ақ қонақтар мектепке «Астана» командасының ойыншыларының қолтаңбалары қойылған форма сыйлады.
«Керемет тәжірибе. Балалардың жігері мықты, позитивті, мен олармен уақыт өткізгеніме қуаныштымын. Балаларға жақсылық, ал мектеп командасына жақын матчта сәттілік тілеймін», — деді Кваме Вон.
«Балаларға өз мақсаттарына ұмтылуға, көп жұмыс істеуге және оларға қол жеткізуге тілектеспін. Мен осы мектепте болғаныма қуаныштымын», — деп қосты Майк Майерс.