«Solve for Tomorrow» – Samsung компаниясы ұйымдастырған орта және жоғары сынып оқушылары арасындағы республикалық әлеуметтік жобалар байқауы. Ол болашақ жас көшбасшылардың шығармашылық қабілеттерін дамытуға, ғылым, технология, инженерия және математиканы (STEM) пайдалана отырып, маңызды мәселелердің шешімін табуға көмектесуге бағытталған.

Қазылар алқасының мүшелері 412 өтінімді жан-жақты зерттегеннен кейін республиканың әртүрлі мектептерінен келген оқушылардың ең перспективалы және қызықты 33 идеясын таңдап алды.

Бірінші тәлімгерлік сессияға қатысу үшін іріктеліп алынған командалар арасында «Jansu», «Тұқымға арналған инкубатор», «Шабыт – өрт сөндіруші робот»  жобаларының авторлары – Астана қаласындағы физика-математика бағытындағы Зияткерлік мектебінің оқушылары да болды.

3 маусым күні информатика пәнінің мұғалімі Ж.Ш. Молдабаева және Б.Б. Ахметова, лаборант Б.М. Кәкімжан, сонымен қатар мектеп оқушылары – Семён Чистяков (8Г), Нажмудин Адиханов (8Г), Кәрім Камалжан (10Д), Қадір Сабыржан (10Д), Арлан Күнбулатов (10I), Бақдәулет Еламанов (10I) Алматы қаласында өткен бірінші тәлімгерлік сеансқа қатысты. Сессияны Қазақстандағы ойлау дизайны бойынша үздік мамандардың бірі Давид Туганов жүргізді, ол қатысушыларға идеялар мен стартаптарды дамытуда ойлау дизайны тәжірибесін үйретті, жұмыстың тиімділігін арттыратын көптеген «құпиялармен», лайфхактармен бөлісті.

Алда NIS FMN командасын тағы бірнеше онлайн тәлімгерлік сессиялары мен практикалық семинарлары күтеді, онда мектеп оқушылары өз білімдерін кеңейтуге және тәжірибелерімен бөлісетін арнайы шақырылған спикерлермен сөйлесуге мүмкіндік алады.

Тәлімгерлік тренингінен өткеннен кейін қатысушылар өз жобаларын жетілдіру бойынша жұмыс істейді және жоба прототиптерін жасайды.

Шілде айының соңында олар байқаудың финалдық бөлігіне қатысу үшін өз жұмыстарын қазылар алқасына ұсынады. Финалда 33 командадан Samsung Electronics таңдаған ең қызықты идеялар мен үздік 10 жобаның авторлары кездеседі.