Астана қаласындағы физика-математика бағытындағы Зияткерлік мектебінде геологияға қызығушылық танытатын мектеп оқушыларының қатары  жыл өткен сайын көбейіп келеді. Жер туралы ғылымды оқушылар арасында кеңінен насихаттауға бағытталған түрлі іс-шараларды ұйымдастыру арқасында осынау қызықты ғылымды танып білуге деген құштарлық арта түсуде.

Жақында мектептегі «Жас геолог» үйірмесінің мүшелері «Қазақмыс Барлау» дала лагеріне барып қайтты. Мектеп оқушылары кен орындарын барлау және бұрғылау жұмыстарының барысымен танысып, геологиялық карталарды зерттеді, тау жыныстарының алуан түрлерін ұстап көріп, күні бойы кен орнындағы геологтардың тіршілік ортасында болуға мүмкіндік алды.

Мұндай іс-шаралар балалардың геологияны және оның нақты әлемдегі маңыздылығын жақсы түсінуі үшін өте маңызды. Сонымен қатар, мұндай экскурсиялар балаларға өздерінің кәсіби қызығушылықтары мен мақсаттарын анықтауға көмектеседі.

Айта кетейік, 2023 жылдың 22 сәуірінде елордада 10-11 сынып оқушылары арасында жас геологтардың ІІІ қалалық олимпиадасы өткен болатын. Геологиялық білімге деген қызығушылықты арттыру мақсатында ұйымдастырылған олимпиаданы «Жас геолог» корпоративтік қоры, «Қазақмыс Барлау» ЖШС,  «ERG Exploration», Л.Н. Гумилев атындағы Еуразия ұлттық университетімен бірлесіп өткізді. Олимпиадаға елорданың 40 мектебінен 80 жас геолог қатысты. Олимпиаданың екі кезеңінің қорытындысы бойынша Зияткерлік мектептің оқушылары  тамаша нәтиже көрсетті:

1 орынды Анар Айтбай жеңіп алды, 11-сынып оқушысы Аян Оспан 2-дәрежелі дипломмен марапатталды.

11В сынып оқушысы Айтбай Анар тамыз айында геология, метеорология, геофизика, океанография және астрономия сияқты пәндер бойынша өтетін Халықаралық Жер туралы ғылым олимпиадасына (IESO) қатысады.

Қазір Зияткерлік мектептің  10 жас геологы 2023 жылдың шілде айында өтетін геология пәнінен республикалық далалық олимпиадаға дайындық үстінде.