2019 жыл 7 қазанда мектеп директорының ғылыми-әдістемелік жұмыс жөніндегі  орынбасары Оспан Рамазан Жаншәріпұлына ҚР Президенті Қасым-Жомарт Тоқаевтың  алғыс хаты табыс етілді. Елбасы Рамазан Жаншәріпұлын ұстаздардың кәсіби мересімен құттықтап, ұрпақ санасына білім сәулесін құйып, мемлекет болашағы саналатын жастардың білікті маман болып қалыптасуына қосып жатқан елеулі еңбегі үшін алғыс білдірді.

 

Оспан Рамазан  –   білім саласында 30 жылдан астам еңбек еткен білікті маман, ұлағатты ұстаз. 1986 жылы С.Сейфуллин атындағы  Целиноград педагогикалық институтының филология факультетін бітірген жас маман педагогикалық еңбек жолын Целиноград қаласында бастады.  2008 жылы ол елімізде бірінші болып ашылған білім ошағы – физика-математика бағытындағы Назарбаев Зияткерлік мектебіне конкурстық іріктеумен қабылданған алғашқы мұғалімдердің қатарында болды.

2009-2010 оқу жылында Рамазан Жаншәріпұлы мектеп директорының ғылыми-әдістемелік жұмыс жөніндегі орынбасары болып тағайындалды. Физика – математика  бағытындағы оқу бағдарламаларын сынақтан өткізетін эксперименталды алаң болып белгіленген білім мекемесін басқарған команда мүшесі болу үлкен жауапкершілікті, үздіксіз ізденісті талап етті. Зияткерлік мектептің қалыптасуына өзіндік үлес қосқан директор орынбасары үш тілде оқыту жолдарын анықтау, оқу технологияларын тәжірибеге енгізу, мұғалім біліктілігін көтеру бойынша елеулі істердің ұйытқысы болды. Оның бірізділігі, мектеп мұғалімдерінің біліктілігін көтеру, білімін жетілдіру жұмыстарын жүйелі де тиянақты жүргізуі Зияткерлік мектеп мұғалімдерінің білімі мен біліктілігін шыңдай түсуіне ықпал етті.

Мектептегі әдістемелік жұмыспен қатар Рамазан Жаншәріпұлы мектеп оқушыларының ғылыми жобалары мен зерттеу жұмыстарын үйлестірумен айналысып келеді.

Рамазан Оспан – басқару жұмысымен қатар бала оқытудан қол үзбеген, үйретуден жалықпаған эксперт дәрежесіндегі мұғалім.  Білікті маманның көп жылғы еңбегі бағаланып, 1997 жылы ол Қазақстан Республикасының «Білім беру ісінің үздігі» атағын алды. 2011 жылы  «Ы.Алтынсарин» төсбелгісімен марапатталды.

«Елбасы атынан мұндай құттықтау алу мен үшін үлкен мәртебе, үлкен қуаныш. Бұл менің көп жылғы еңбегімнің еленгені, маған қолдау көрсеткен әріптестерімнің еңбегі, сіздерге алғысым шексіз» — деді марапаттау рәсімен кейін Рамазан Жаншәріпұлы.

Физика-математика бағытындағы Назарбаев Зияткерлік мектебінің ұжымы Рамазан Жаншәріпұлын осынау жетістігімен құттықтай отырып, білім саласындағы қызметіне тек өрлеу мен өркендеу тілейді.