Жақында Нұр-Сұлтан қаласы физика-математика бағытындағы Зияткерлік мектептің алғашқы түлектері Бекет Төлегенов пен Азат Сүлейменов  мектепке келді.

Бекет Төлегенов – Embry-Riddle Aeronautical University америкалық аэроғарыш университетін бітірген бірінші қазақстандық. 2019 жылы Бекет PhD докторы дәрежесін қорғап, Нью-Хэмпшир университетінде ғылыми қызметкер болып жұмыс істеді. Жақында «Болашақ» бағдарламасының түлегі елге оралды.

Азат Сүлейменов – Назарбаев Университетінің түлегі, Бостон университетінің магистранты. Қазір Азат Калифорнияда тұрады. Ол Tesla бәсекелесі болып табылатын Lucid Motors компаниясының аға инженері дәрежесінде электр қозғалтқышын жасаумен айналысатын командада жұмыс істейді.

2021 жылы Азат Forbes Kazakhstan газеті жариялаған “Болашағы зор 30 қазақстандық” рейтингіне енді. Бұл тізімге 30 жасқа  дейін жетістігімен қоғамға танымал болған талапты жастар кіреді.

Түлектер мектеп директоры Мейрам Әміржанұлы Жәкеновты және өздерінің сүйікті мұғалімі Гүлнара Кенжебайқызы Апееваны жаңа оқу жылының басталуымен құттықтады.

Зияткерлік мектептің бұрынғы оқушылары мектепті, оқу кабинеттерін аралап, мұғалімдермен жүздесті.

Кездесу барысында Азат пен Бекет 10 жыл бұрынғы жағымды сәттерді, қызықты және маңызды оқиғаларды еске алып, қол жеткізген жетістіктері туралы айтты, болашақ жоспарларымен бөлісті.

” Мектеп бітірген әр баламыздың өмірлік жолына қызығушылық танытып, үлкен және кішкентай жеңістеріне қуанамыз. Бекет пен Азат Зияткерлік мектеп түлектерінің Алтын қорына кіреді. Олар өздерінің білімі мен біліктілігімен ерекшеленіп қана қоймай, мектеп беделін көтеріп, мерейін үстем етті. Түлектеріміз мектепке келгенде бір жасап қаламыз, бұл кездесулер ерекше жылулық пен қуаныш сыйлайды”, – дейді мектеп директоры Мейрам Жәкенов.