Бірінші қыркүйекте Астана қаласы физика-математика бағытындағы Назарбаев Зияткерлік мектебінде жаңа 2023-2024 оқу жылының басталуына арналған салтанатты жиын өтті.

Дәстүр бойынша бірінші болып жетінші сынып оқушылары, “Өркен” білім беру грантының иегерлері таныстырылды, биыл олардың саны 144.

Білім күніне арналған мерекелік салтанатты мектеп директоры Әсел Бейсембинова ашты. Ол мектеп ұжымын жаңа оқу жылымен құттықтап, алдағы мерейтой-мектептің 15 жылдығы туралы еске салды. Сондай-ақ Әсел Сайдуғалиқызы ағымдағы жылы мектептің 149 түлегі оқуын үздік аяқтап, еліміздің және шетелдердің жетекші университеттеріне оқуға түскенін атап өтті.

Салтанатты жиында мектеп басшысы жазда өткен халықаралық олимпиадалар мен конкурстарда жеңіске жетіп, мектеп мерейін үстем еткен жеңімпаздарды марапаттады.

Профессор Айтжан Тоқтаған жетекшілік ететін домбырашылар ансамблі орындаған “Балбыраун” күйі көптің көңілінен шықты.

Мұғалімдер дайындаған көңілді би Іс-шараны жарқын аяқтаған тосынсый болды.

Биыл жаңа оқу жылын бастаған күміс қоңырауды соғу құрметі оқу үздігі Ансар Зейнулла мен 7Е сынып оқушысы Нурия Оспановаға берілді.

Салтанатты жиыннан кейін барлық сыныптарда “Әділ Қазақстан: сапалы білім, адал ұрпақ, табысты ұлт” тақырыбына арналған “Шаңырақ сағаттары”аясында алғашқы сабақтар өтті.

Білім күні құтты болсын, достар!

Жаңа оқу жылы жарқын жаңалықтарға толы жемісті, жеңісті болсын!