Нұр-Сұлтан қаласы физика-математика бағытындағы Назарбаев Зияткерлік мектебі Қазақстан Республикасының Тұңғыш Президенті күнін атап өтуге қызу кірісті. Мерекелік іс-шаралар кешені Нұрсұлтан Әбішұлының өмірбаяны мен еңбек жолына кең көлемді шолу жасайтын «Ел тірегі-Елбасы» атты кураторлық сағаттардан басталды. Айтулы күнге орай Елбасы атындағы мектеп оқушылары ҚР Тұңғыш Президентінің мұражайында өтетін сабаққа қатысады. Мұражайда оқушылар жаңа тәуелсіз мемлекеттің іргетасын қалаушы Нұрсұлтан Әбішұлы атқарған игі істер мен ерен еңбектің куәгері болған жәдігерлермен танысады.
Жас зияткерлер Microsoft Teams платформасында «Елбасы бастаған “Нұрлы жол” тақырыбында Елбасы кітапханасының қызметкерлерімен онлайн-кездесу өткізеді. Сонымен қатар, шығармашыл оқушылар арасында “Елін сүйген Елбасы” эсселер байқауы, “Менің Отанымның тарихы” бейнебаяндар конкурсы, “Тарих білгірлері” зияткерлік сайысын өткізу де көзделіп отыр.
Зияткерлер үшін ерекше елеулі күнге айналған, Елбасын ұлықтайтын жалпыұлттық мерекеге арналған тағылымды шаралар «20 жылдан кейінгі менің Қазақстаным» атты дөңгелек үстелмен, дәстүрлі жас домбырашылар флешмобымен жалғасатын болады.