19 тамыз күні «Назарбаев Зияткерлік мектептері» ДББҰ Басқарма төрайымы Шәмшидинова Күләш Ноғатайқызы Нұр-Сұлтан қаласы физика-математика бағытындағы Зияткерлік мектеп ұжымына жаңа басшыны таныстырды. Елордалық мектеп директоры қызметіне бұған дейін Ақтау қаласындағы НЗМ директоры қызметін атқарған Бейсембинова Әсел Сайдуғалиқызы тағайындалды.
Әсел Сайдуғалиқызы 2011 жылдан бастап «Назарбаев Зияткерлік мектептері» желісінде жұмыс істейді. Еңбек жолын Өскемен қаласындағы химия-биология бағытындағы Назарбаев Зияткерлік мектебінің ағылшын тілі мұғалімі болып бастаған Әсел Бейсембинованың жетекшілік, әкімшілік және ұйымдастырушылық тәжірибесі мол. Ол 6 жыл директордың оқу ісі жөніндегі орынбасары болып жұмыс істеді, 2020-2021 оқу жылында Ақтау қаласы НЗМ директоры болып тағайындалды. Кәсіби құзыреттерді дамыту мақсатында Швецияда, Арменияда, Ұлыбританияда тағылымдамадан өткен.
Жиын барысында мектептің бірінші басшысы Мейрам Әміржанұлы Жәкеновке әріптестері ыстық ықыластарын білдіріп, игі тілектерін жеткізді.
«Құрмет» орденінің кавалері, Қазақстан Республикасы білім беру ісінің құрметті қызметкері, «Ы.Алтынсарин» төсбелгісінің иегері Мейрам Әміржанұлы білім беру жүйесінде 40 жылдан аса еңбек етті. Зияткерлік мектептер желісінің негізін қалаған білікті басшы 14 жыл тұңғыш Зияткерлік мектептің директоры қызметін атқарды. Жаңа форматтағы білім ордасын құруда барлық оқушылар мен мұғалімдердің мектепте өзін жайлы сезінуі үшін аянбай еңбек етті.
Мейрам Жәкеновтың бастамасымен мектеп технопаркі – NIS HUB, балалар жобалау және зерттеу қызметімен айналысатын алаң құрылды. Оның жетекшілігімен 2022 жылдың мамыр айында Гиннестің рекордтар кітабына мектептің 1000 жас домбырашысының бір мезгілде ойыны тіркеліп, мектептің шығармашылық жетістіктерінің «қорын» толықтырды.
Мектеп ұжымы Мейрам Әміржанұлын өмірінің жаңа кезеңінің басталуымен құттықтап, оған зор денсаулық, жаңа жоспарлар мен жаңа идеяларды жүзеге асыруда сәттілік тіледі.