Зияткерлік мектептің желаяқ жүйріктерін анықтау, оқушылар арасында жеңіл  атлетика спорт түрлерін дәріптеу мақсатында 2019 жыл 19 қыркүйекте 7-12-сынып оқушылары қатысқан Күзгі кросс өтті. Күзгі жарысты ұйымдастыруға дене шынықтыру пәні мұғалімдеріне оқушылардың өзін-өзі басқару ұйымының спорт министрлігі көмектесті. Жарыс ережесіне сай 7-12-сынып қыздары 500 метр, 7-9-сынып ұлдары 500 метр, 10-12-сынып ұлдары 1000 метр қашықтықты жүгіріп өтті.  Күздің жайма-шуақ күні спорттық шараға қатысушылардың жоғары нәтиже көрсетуіне жақсы ықпал етті. «Жүйріктен жүйрік озар жарысқанда» демекші, спортшылар межеге бірінші болып келуге барын салды. Қызу тартыста жоғары сынып қыздары арасынан бірінші болып келе жатқан Ламанова Каринаны соңғы сәттерде Айжан Каиржанова басып озды. Негізгі мектеп оқушы қыздары арасынан Ахметова Наргиз (9F), ұлдар арасынан  Аманғазы Елжан (8А) үздік нәтиже көрсетіп, жеңімпаз атанды. Ұлдар арасында тартыс секундтар үшін жүрді. 1000 метрді бірінші болып бағындырған Әбдикәрімов Ерик мектептің желдей ескен жүйрігі атанды.

Алда Зияткерлік мектептің жеңіл атлеттерін түрлі спорт сайыстары күтеді.