Астана қаласындағы физика-математика бағытындағы Зияткерлік мектептің 9Н сынып оқушысы Жанарыс Қапаров World Robot Olympiad (WRO) әлемдік финалында үшінші орынды иеленді.

WRO-8-19 жас аралығындағы оқушылар мен студенттерге арналған білім беру робототехникасы бойынша өтетін ең беделді халықаралық олимпиадалардың бірі. Биылғы жылы WRO 7-9 қараша аралығында Панамада ұйымдастырылып, жүзден астам елдің командаларын жинады.

Жанарыс бала кезінен робототехникамен әуестенеді және “Роботек”жекеменшік мектебінде осы саланы терең меңгеріп жүр.

 Ол WRO-да Қазақстанның екі дүркін чемпионы. Өткен жылы Германияның Дортмунд қаласында өткен WRO-да еліміздің құрамасының атынан қатысты.

Ағымдағы жылы іріктеудің барлық кезеңдерінен өтіп, еліміздің чемпионы атанғаннан кейін зерек оқушы “Robotec cyrex”командасының атынан Қазақстан құрамасының құрамында Панамаға жолдама алды.

Айта кету керек, Жанарыс робототехникамен қатар футбол, баскетбол ойнағанды жақсы көреді, бағдарламалау, компьютерлік технологияларға қызығушылық танытады, сонымен қатар гитара мен домбыра тартады. Талапты бала NIS оқушыларымен бірге Гиннестің рекордтар кітабына енген ашық домбыра сабағына қатысқанын мақтан тұтады.