«Әйтеке» дебат клубы еліміздегі пікірсайыс клубтарының үздік үштігіне енді

Жуырда Елордада тұңғыш рет мектеп пікірсайыс клубтарының құрылтайы өткізілді. І республикалық пікірсайыс құрылтайын Ozgerteam қоғамдық қоры ұйымдастырған. Құрылтай барысында пікірсайысшылар елдегі дебат қозғалысының дамуындағы өзекті мәселелерді талқылап, жылды қорытындылады.

Сондай-ақ жиын барысында Sanaly Orta республикалық байқауы ақтық кезеңінің жеңімпаздары марапатталды. Нәтижесінде Ақтөбе қаласындағы Назарбаев Зияткерлік мектебінің «Әйтеке» дебат клубы жүлделі 3-орынды иеленді. Құрылтайға Ақтөбе облысынан NIS-тің тарих пәні мұғалімі Асқар Бисенғалиев пен клуб президенті Ясмин Аймұқанова қатысты.

«Пікірсайыс құрылтайынан керемет әсер алдық. Еліміздің түкпір-түкпірінен жиналған пікірсайысшылармен танысып, ой бөлістік. Алдағы уақытта олармен бірлескен турнирлер өткізу жоспарда бар. Сонымен қатар өз облысымызда дебат қозғалысын дамытуға үлес қосқымыз келеді», – деді Асқар Бисенғалиев.

Шара соңында делегаттар 12 желтоқсан күнін бейресми түрде пікірсайысшылар күні етіп белгілеуді қолдап, бұл дәстүрді жыл сайын жалғастыруға ниет білдірді.

Айта кетейік, «Әйтеке» дебат клубы Ақтөбедегі Назарбаев Зияткерлік мектебінде 2021 жылы құрылған. Қазіргі таңда оның құрамында 80-ге жуық оқушы бар.