NIS-те «A million dreams» желілік арт-фестивалі басталды

Бүгін Шымкенттегі химия-биология бағытындағы Назарбаев Зияткерлік мектебінде «A million dreams» желілік арт-фестивалі басталды. Шабыт пен өнер алаңында NIS экожүйесіне кіретін 22 мектептен 286 оқушы бас қосты.

Ашылу салтанатында NIS ДББҰ Басқарма төрағасының орынбасары Сабыржан Садуакасов Назарбаев Зияткерлік мектептерінде оқушылардың тек академиялық біліммен шектелмей, шығармашылық тұрғыда да жан-жақты дамуына ерекше мән берілетінін атап өтті.

Қатысушылардың жұмысы мюзикл, көркем сурет және графика, арт-фото, әлеуметтік бейнеролик, қолөнер бұйымы бағыттарында бағаланады.

Фестивальдің қазылар алқасына кино, театр және өнер саласындағы танымал сарапшылар кірді: «Talas Film» киностудиясының директоры, кинорежиссер Серік Таласов, «Күлкі базар» театрының директоры, театр және кино актері әрі режиссері Ғалымжан Құрманбекұлы, журналист, тележүргізуші, «Ontustik» телеарнасының продюсері Асхат Садырбай, Оңтүстік Қазақстан облысы Дизайнерлер федерациясының төрағасы Расылбек Естемесов және суретші Серікбай Жорабеков.

«A Million Dreams» арт-фестивалі NIS оқушыларына шығармашылық ортаға еніп, идеялар алмасуға және жаңа достармен танысуға жол ашады.